Pumpboat natikyaob 1 patay, 2 naluwas

Patay’ng lawas sa wala hiilhing lalaki nga naglutaw sa kadagatan ang nabangalan samtang naluwas usab ang amahan ug anak gikan sa mitikyaob nga pumpboat sa miaging gabii sa Hilotongan Channel sa lungsod sa    Cordova.

Si SPO1 Henry Amores nga gikahinabi sa Banat News miingon nga ang mga sakop sa Philippine Coast Guard maoy nakakaplag sa wala hiilhing patay’ng lawas ug gipahiluna kini sa usa ka punerarya sa maong dapit.

Giila usab ang mga naluwas sa mitikyaob nga pumpboat mao sila si Eleuterio Mingueto,Sr. ug Eleuterio,Jr. nga pulos hingkod ang panuigon ug lumolupyo sa maong lugar.

Si Hilotongan barangay Kapitan Antonio Ompad maoy unang nakadawat sa report nga dunay natikyaob nga pumpboat hinungdan nga milusad sila og search and rescue operation sa maong bahin sa dagat.

Apan tungod sa kapakyas, nangayo og tabang si Ompad sa coast guard.

Sa pakisusi ni Kapitan Ompad nasayran nga nanglangoy na lamang ang mga biktima paingon sa kabaybayonan sa mainland human matikyaob ang ilang bangka.

Si SPO1 Henry Amores sa Cordova Police Station miingon nga gikan Pangan-an sa Olango Island ang mga biktima aron mamalit og isdang dad-on sa usa ka restaurant sa Mabolo.