Tulo ka bata nadala sa tambalanan human mokaon og tuba-tuba

Tulo ka mga bata duha niini managsuon ang nangahilo sa  tuba-tuba human nila gipangaon ang bunga niini sa miaging hapon diha sa Campo 8, dakbayan sa Toledo.

Maayo nalang kay nadali paghatud sa Toledo District Hospital ang mga bata sa ilang mga ginikanan nga giila ang managsuong Lyngie nga sila si Maria 4, ug John Kenneth 2, ug ilang ig-agaw nga si Emmanuel Parame, 5 anyos, ang tulo pulos residente sa nahisgutang lugar.

Ang apohan nga si Benvenida kinsa maoy nagbantay sa mga biktima sulod sa District Hospital mibutyag nga ang managsuong Lyngie giligo sa ilang inahan sa atabay samtang kini nanglaba sa bulingon.

Human og kaligo kalit lang nawagtang ang duha ug didto diay nikuyog sa ilang ig-agaw nga si Parame.

Matud ni Benvenida human og laba sa inahan gipangita dayon ang duha niini ka anak ug pag-umangkon diha sa luyo sa ilang balay nga dunay giusap.

Sa dihang gipangutana sa inahan kung unsay ilang gikaon wala maningog ang tulo apan natimahoan sa inahan ang duha niya ka anak nga nanimahong tuba-tuba.

Pagkataudtaod gibati sa tulo ka mga bata ang pagmulo ug pagpanakit sa ilang mga tiyan hinungdan nga gidali dayon pagdala sa tambalanan.

Gituuhan sa apuhan nga gikuhit sa tulo ka mga bata ang bunga sa tuba-tuba kay taas man kining punoan ug gidukdok dayon gipangkaon.

Tungod niini nakahukom nalang si Benvenida nga iyang putlon ang usa ka punoan sa tuba-tuba nga nagbarog sa luyo sa iyang balay.