Gipadad-an na og final bills of sale sa kagamhanan sa dakbayan sa Sugbo ang administrador sa Cebu Citi Center Corporation.
Kini may kalabutan sa pagkahalin sa building ug luna sa Cebu Citi Center diha sa Barangay Kamagayan atol sa subasta nga gipahigayon sa city hall.
Gibaligya sa siyudad ang Citi Center tungod sa giingong kapakyas sa tag-iya ug tagdumala niini pagbayad og buhis sa dakbayan sulod sa pipila na ka tuig.
Ang nahisgutang kabtangan dunay assessed value nga mokapin sa P18.3 milyones, apan kini giingong nahalin lang og kapin sa P4.3 milyones.
Una nang giplanohan ni Mayor Tomas Osmeña nga himuong sunken park ang Cebu Citi Center.
Kini aron dunay kaduwaan ang kabataan diha sa nahisgutang barangay ug dunay mosawo sa tubig panahon sa ting-uwan.
Apan tungod sa maong kalamboan, posibleng dili na mahinayon ang plano sa mayor tungod kay duna nay nakapalit niini.
Sa pikas bahin, laing building ug luna diha sa barangay Kamagayan ang nahalin na usab atol sa gipahigayon niining subasta.
Ang dakbayan mipadala na og notisya alang sa issuance sa final deed to purchaser niini ngadto sa CITI Center Corporation, tag-iya sa maong kabtangan.
Sa susamang kalamboan, laing pribadong building ug luna nga gipanag-iya diha sa Barangay Sambag Dos ang gibaligya usab sa siyudad.
Kini tungod gihapon sa kapakyas sa tag-iya niini pagbayad og tukmang buhis ngadto sa dakbayan sulod usab sa pipila ka tuig.
Gipadalhan na usab sa siyudad og final bill of sale ang tag-iya niini nga si Elpidio de Dios, human mapalit ang kabtangan niini sa usa ka Ipher Tabanag atol sa subasta.