Polis nga di motunga sa drug hearings kasuhan

Gipaabot nga mag-atubang og bug-at nga silot kadto unyang mga polis nga masakpang magpabaya ug dili na motambong sa husay sa mga kaso sa mga suspetsado niining dinakpan may labot sa paghupot og pagpamaligya og gidiling drugas.

Mao kiniy gikasabutan atol sa gipahigayung panagtigum kagahapon tali sa mga huwes pinangulohan nila ni Regional Trial Court (RTC) Executive Judge Fortunato De Gracia ug Judge Gabriel Englis ngadto kang National Police Commission (NAPOLCOM-7) regional director Bernardo Calebo.

Atol sa maong panagtigum gihisgutan niini ang kadaghanan sa mga kaso may labot sa gidiling drugas ang mabasura lang tungod kay dili na manambong sa husay ang polis nga maoy nakadakop.

Kadaghanan ning maong mga kaso nahitabo diha sa sala mismo nila ni Judge de Gracia ug Judge Englis.

Gumikan niini nipasalig si director Calebo nga ilaha kining aksyonan pinaagi sa pagpaubos og imbestigasyon niadtong mga polis nga mobalewala sa mga kasong ilang gisang-at.

Gipasalig ni Calebo nga dili sila magmakuli pagpahamtang og bug-at nga silot niadtong ilang mga sakop nga mapamatud-ang nagpabaya.