Patay ’ng nadangat sa Cebu City Medical Center kagahapon sa buntag ang usa ka lalaking taga Ozamiz City human kini pusila sa lalaking iyang gikakomprontase sa milabay’ng buwan diha sa barangay Suba niadtong milabay’ng buwan.
Ang biktima nga naila lang sa pangalan nga Nonoy gipusil sa silingang si Demetrio Cabangca alyas Kingkong, silingan sa biktima diha sa Block 5, sa dalan Garfield sa barangay Suba.
Sa imbestigasyon nila ni PO2 Buenventura Ursaiz sa Homicide Section nasuta nga nagbarog-barog lang ang biktima diha daplin sa dalan dihang giduol sa suspek.
Ang suspek walay daghang pangutana kalit nga mibunot og wala matinong kalibre sa armas dayon gipusil sa biktima diha sa tiyan makausa ka higayon diin ang bala milapos diha sa tuong bahin sa iyang lawas.
Sila si PO1 Basiledes Resureccion sa San Nicolas Police station ug PO1 Gilbert Igot sa Criminal Investigation and Intelligence Branch nga parehong mga Field Training Program ug kasamtangang gidestino sa maong dapit maoy daling miresponde.
Apan wala na diha ang suspek ug gidali nila og dala sa CCMC ang biktima apan gideklarar kining dead on arrival.
Nasuta sa kapolisan nga nagkakomprontase ang duha niadtong milabay’ng buwan tungod sa manok.