'Kawatan' dakpan gipatay

Namatay ang usa ka gipasanginlang kawatan human kini masakpi ug gikulata human ang tagbalay nga buot unta niyang kawatan nakamata ug anak niini  nga usa ka black belter sa karate kinsa bisan napusilan na nakahigayon pa sa pag-ilog sa armas ug migapos sa suspetsado.

Ang namatay mao si Erasmo Ermie Dabon, 53, nga taga Lower Tabok, dakbayan sa Mandaue kinsa kanhi nabilanggo na sa kasong giatubang nga paghupot og ilegal nga armas.

Si SPO1 Edgar Pasaylo miingon nga si Lerma Abanid, 57, nga nagpuyo sa maong dapit kinsa maoy tag-iya sa panimalay nga gisaka sa suspetsado maoy unang nakamatikod alas 3 pasado ang takna sa miaging kaadlawon.

Gipusil unta kini sa suspetsado apan wala makaboto nga maoy hinungdan nga gihapak niini og armas ang ulo ni Lerma.

Dugang pa ni SPO1 Pasaylo nga si Joselito Abanid,  27, nahigmata sa ikaduhang andana daling mikanaog apan gipusil siya sa suspek sa bukobuko.

Matud pa ni Pasaylo nga bisan kon naigo ang bukobuko ni Joselito apan nakahigayon pa kini sa pagpakigharong hangtod nga nailog ang hinagiban ug giunay kini sa pagpusil sa nawong.

Gigapos ni Joselito ang suspetsado og habol ug ang mga silingan dali usab nga midala kaniya uban sa iyang inahan ngadto sa pribadong tambalanan sa dakbayan sa Sugbu.

Si SPO1 Pasaylo miingon nga ang suspetsado kinsa ilang naabtan nga ginapos sa habol nga nagping-it sa kasakit sa bun-og sa kalawasan ang dali usab nilang gidala sa Mandaue City Hospital apan namatay pipila ka gutlo ang nakalabay.