PDCC andam sa katalagman

Preparado na kaayo ang mga sakop sa Cebu Provincial Disaster Coordinating Council alang sa pagtubag sa bisan unsang matang sa kalamidad nga moigo dinhi sa sugbu subay usab sa mga kalamidad nga niabot sa nagkalahi lahing lugar sa nasud.

Si Bise gobernador Gregorio Greg Sanchez Jr. miingon nga kanunay nga nihimog tigom ang sakop sa PDCC sa ila nga mga lakang nga pagahimoon kun ugaling adunay moigo nga kalamidad sa lalawigan sama sa bagyo, linog ug uban pa.

Suma pa niini nga aktibo kaayo ang ilang grupo sa probinsya labi na ang mga kontak niini sa kalungsuran matag karon ug unya kini aron masiguro nga maka-responde kini sa mga dinali-ang aksyon.

Iyang gibutyag nga ang probinsya sa Sugbu nigahin sa PDCC og 10 milyones ka pesos nga pundo aron maoy gamiton sa mga emerhensya nga panginahanglan sama sa pagpamalit og pagkaon, tambal ug mga gasto sa ilang komunikasyon.

Giklaro usab sa bise gobernador nga walay angayang kabalak-an bisan paman ning pagsigeg uwan kini tungod kay gibantayan na kining mga area nga adunay posibling pagdahili sa yuta.

Hinoon iyang giklaro nga kining mga landslide sa probinsya na stabilized na kini karong mga panahuna gumikan kang ang DPWH mihimo man usab sa pagpangriprap sa mga ni-cave in nga mga dapit.