Siyam ka balay ang hingpit nga gilamoy sa sunog, tulo ang nadanyos samtang usa ka babaye ang naangol dihang miulbo ang sunog diha sa dalan C.Padilla sa barangay Duljo-Fatima kagahapon sa hapon.
Ang nalandig sa tambalanan giilang si Geralyn Abello,19, anak sa tag-iya sa balay diin magsugod ang kalayo nga si Ramon Abello.
Si SFO2 Felix Romero, fire scene investigator sa dakbayan mitug-an sa Banat News nga ang nangaapil og kasunog nga balay gipanag-iya nila ni Noel Barbac, Mike Miguel Cabataño, Joseph Villaber, Antolin Navarro, Tita Escalante, Carmen Escalante, Brigido “Boy” Bacalso ug Vicente Misterio.
Samtang daling nasalbar gikan sa pagkaugdaw mao ang mga balay nila ni Catalina Alcala, Jun Togade ug Glen Election human gikaon sa kalayo ang pipila ka bahin sa ilang mga balay.
Ang naangol nga si Abello sa pakighinabi sa Banat News mitug-an nga kasamtangan siyang natulog sa iyang lawak sa ikaduhang andana dihang nakadungog siya og mga singgit sa mga tawo nga nasunog na ang ilang balay.
Sa iyang karatol wala na siya moagi sa hagdan ug daling milayat sa terasa sa ilang balay apan adto siya napunta sa bantok nga bahin sa yutang iyang gilayatan hinungdan sa pagkapiang niini.
Kauban ni Geralyn diha sa balay niadtong higayuna ang iyang maguwang nga si Grace kinsa walo ka bulang mabdos. Si Grace nga diha sa silong niadtong tungura mitug-an nga diha sa ilang lawak nagsugod ang kalayo ug nadunggan nalang usab niya ang mga silingan nga misinggit kabahin niini.
Duha sa iyang mga anak nga lalaking singko anyos ug tres anyos ang iyang giuna og dagan palayo sa lugar ug wala na makabitbit og mga butang.
Matud pa sa duha ang ilang amahan kasamtangang naningil sa ilang mga gipautang nga mga shellcraft niadtong higayuna.
Si SFO2 Romero mitug-an nga milanat lang og 20 minutos ug nakontrolar na nila ang kalayo nga gideklarar ngadto sa second alarm. Siyam ka trak sa bombero gikan sa BFP ug mga fire volunteers ang miresponde.
Matud pang Romero sa ilang pag-abot sa dapit daghang mga tawo ang miilog sa ilang mga hose.
“Lisud baya kay dunay mga tawo nga magpabombero-bombero, nangilog og fire hose kay gusto silang unahon ang ilang balay,” asoy pang Romero.
Sagad sa mga balay ginama sa light materials maong daling mikatap ang kalayo.