Duha ka mga tawo ang nangamatay human gipangdunggab sa managlahing lugar sa probinsya niadtong Miyerkules sa gabii ug Huwebes sa kaadlawon sa Dalaguete ug Toledo.
Usa ka Benbenido Abadinas ug residente sa Sitio Pandong, Bato Toledo ang nakaangkon og daghang samad dinunggaban sa nagkadaiyang bahin sa lawas nga maoy nakaingon sa iyang kamatayon human dunggaba sa iyang silingan nga si Dindo Abadinas Lapuz, 18, nga iya ra usab kabanay.
Ang biktima ug ang suspek nag-inom niadtong Miyerkules sa gabii pasado alas 10 sulod sa residensya sa biktima apan nianang pagkabuntag nakit-an nalang kining nagbuy-od sa yuta.
Walay bisan usa nga nakahibaw sa maong hitabo gawas lang sa manghod sa suspek nga maoy nitug-an nga ang iyang maguwang maoy responsable sa krimen.
Gikatahong gipasidan-an pa ang menor de edad sa suspek nga dili mosulti ni bisan kinsa apan nanabi kini hinungdan nga nahibaw-an sa mga tawo. Ang suspek padayong nagtago-tago human milayas sa ilang pinuy-anan.
Samtang sa Barangay Nalhub, Dalaguete usa ka lalaki ang napalgang patay sa iyang silingan diha sa kasagbutan nga nabulit usab og samad dinunggaban sa kalawasan.
Ang biktima mao si Francisco Agtong, samtang ang gipasanginlang nidunggab kaniya mao si Areston Behetil, 18, mag-uuma ug residente ra usab sa maong dapit.
Usa ka Torpio Ambrad maoy nakakita sa patay’ng lawas sa biktima niadtong pasado alas 5 sa Huwebes sa buntag sa kasagbutan daplin sa dalan samtang siya padulong sa umahan.
Sila si SPO1 Carlito Amarillo ug PO3 Cleto Pia nga maoy miresponde sa dapit nagkanayon nga nabulit og dinunggaban ang biktima nga maoy nakaingon sa kamatayon niini.
Matud pa si Behetil nisurender ni barangay captain Victor Gamboa human sa hitabo ug gi-turn over ngadto sa buhatan sa kapolisan ug kasamtangan nang gibalhog sa karsel.