Bisan pa og gi-dismiss ni Regional Trial Court Judge Benjamin Saniel ang kasong murder nga giatubang nila ni Sgt. Heracleo Rallistan ug Nestor Carrol apan dili gihapon kini makagawas sa bilanggoan.
Gipadayag ni Cebu City Prosecutor Nicolas Sellon nga makagawas lang sila si Rallistan ug Carrol kun ugaling makapiyansa kini sa laing kaso nga ilang giatubang nga pending karon sa korte may labot sa ilang paghupot og mga tag-as nga kalibre sa armas.
Sila si Rallistan ug Carrol nasikop sa kapolisan sa dakbayan sa Lapulapu sa gilusad nga checkpoint didto sa Mactan sa tuig 2004 gumikan sa pagkarga og mga tag-as nga kalibre sa armas sa ilang sakyanan nga walay lisensiya.
Sila si Rallistan ug Carrol bag-ohay pang gipakaway-sala ni Judge Saniel sa kalambigitan niini sa kasong murder ni Michael Favila nga gitumbok nga maoy mipusil patay kang Atty. Arbet Sta. Yongco niadtong sayong bahin sa tuig 2004.
Kini subay sa mosyon nga giduso sa abogado sa depensa Atty. Noel Archival nga nagpadayag nga huyang ang ebidensya nga gipresentar sa prosekusyon nga maglambigit sa iyang kliyente sa maong kaso.
Nasayran nga si Atty. Yongco mao kini prosecutor sa kasong parricide nga gipasaka batok kang PBMA leader Ruben Ecleo Jr. gumikan sa kamatayon sa iyang asawa nga si Alona Bacolod Ecleo.