Mandaue nahimong killing field gikabalaka

Nabalaka ang pipila ka mga opisyal sa dakbayan sa Mandaue nga mamahimong killing field ang maong dakbayan kun magpadayon ang mga nahitabong sunodsunod nga patay nga nahitabo sa maong lugar karon lang bag-o.

Gitumbok ni konsehal Diosdado Suico ang  pagpusil patay sa magpapatigayon nga si Benjamen Barquero didto sa Alang-alang Mandaue niadtong milabay’ng kaadlawon ug gisundan sa usa ka magpapatigayong James Yu sa Wireless, Mandaue.

Ang suspek sa pagpusil patay kang Barquero gituohang sakop sa Akrho fraternity.

Tungod niini gipadayag ni  Suico nga peligro nga mahimo unya nga killing fields ang ilang dakbayan kun pasagdan ang maong kasungian karon sa magkaribal nga fraternity nga moresulta sa pagka-angin sa pipila ka mga inosenting biktima.

Gihagit hinuon sa konsehal ang hepe sa kapolisan sa dakbayan Sr. Supt. Alexander Abadinas nga doblehon ang kampanya niini pagpalig-on sa seguridad ug pagsumpo sa mga mitumaw karong krimen.

Apil sa giawhag niya ang mga opisyal sa kabaranggayan nga motabang sa pag-monitor sa presensya sa mga mag-karibal nga fraternity diha sa kabaranggayan aron malikayan ang mga dugang pang duguong panghitabo sa mosunod nga mga adlaw.

Nagkanayon ang konsehal nga kun magpadayon ang maong mga krimen nabalaka siya nga mo-atras usab unya ang mga negosyante pagbubo og puhonan sa dakbayan tungod sa problemado nga peace and order situation niini.