Patay on the spot ang presidente sa Association of Barangay Council sa San Francisco, isla sa Camotes human kini pusila sa duha ka tawo nga nagtaptap sa nawong didto sa plaza sa Poblacion, Danao kagahapon sa udto.
Ang biktima mao si Cresencio Formentiera Estrera, 55, residente sa Sta. Cruz, San Francisco, diin siya usab ang barangay kapitan.
Base sa pasiunang imbestigasyon ni SPO3 Edgar Gomez ug SPO1 Allan Muñoz sa kapolisan sa Danao, nasayran nga gikan ang biktima sa korte nga mitambong og hearing sa kasong gipasaka batok kaniya.
Matud pa ni SPO1 Muñoz nga si Estrera uban sa iyang mga igsuon nga si Eusebio ug Pepito nga nag-atubang og kasong frustrated murder human kini pasakai og kaso sa usa ka Rolan Montalban.
Matud pa ni Eusebio, igsuon sa biktima, human sa hearing kagahapon sa udto sa sala ni Danao City Regional Trial Court Branch 25 Judge Edito Enemesio mipauli na sila agi sa plaza sa Danao ug sa dihang medyo nadistansiya og gamay si Cresencio sa iyang mga igsuon, kalit kini nakadungog og sipa nga buto ug sa paglingi niini ilang nakita ang ilang maguwang nga nalup-og sa yuta ug nagkadugo.
Si SPO1 Muñoz miingon nga gumikan sa samad pinusilan sa ulo ni Cresencio agi sa usa ka taas nga kalibre sa armas namatay kini dihadiha ug wala na kini madala pa sa tambalanan.
Ang suspetsado nga gihulagway sa igsuon ni Cresencio nga si Pepito nga mga batan-on pa ang namusil nga nagtaptap og t-shirt sa nawong sama sa ninja nga mata ra ang makita hinungdan nga wala sila makaila sa mamumuno human kini misibat luwan sa usa ka motor padulong sa dakbayan sa Sugbu.
Ang kapolisan sa Danao mihimo pa og dugang imbestigasyon kalabot sa maong insidente ug pagsusi kun unsay motibo sa pagpatay lakip na ang pag-ila sa mamumuno ni Estrera.
Matud pa ni SPO1 Muñoz duha ka anggulo ang ilang gihatagan og pagtagad ug kini mao ang politika tungod kay hapit na ang eleksiyon sa barangay. Gidudahan usab sa kapolisan ang kasong giatubang sa magsuong Estrera ngadto sa korte sa Danao nga usa sa hinungdan sa pamusil.
Samtang si Rolan Montalban, reklamante sa kasong frustrated murder batok sa magsuong Estrera, hangtod ning pagsuwat sa balita wala pa makuhai sa iyang habig sa kapolisan kalabot sa maong insidente.