Crane sa DPWH nibarag 2 crew nahagbong sa tulay

Nagkupo-kupo diha sa sapa sa Mananga ang drayber ug duha ka crew sa bridge inspection vehicle nga usa ka crane sa Department of Public Works and Highways (DPWH) human ang mga biktima milayat og tuyo dihang mitakilid ang maong sakyanan niadtong Miyerkules sa hapon diha sa South Coastal Road habig sa Barangay San Isidro atbang sa city hall  dakbayan sa Talisay.

Ang mga biktima giila ni PO2 Amelito Hornales, polis sa traffic division sa siyudad nga sila si Bienvenido Lipatan, 53, drayber sa sakyanan, Inclecio Librado, 43 ug Erfren Sarco, 42, mga  crew.

Ang maong mga biktima kinsa nakaangkon og mga bun-og sa lawas ug mga bali sa ilang bukog ang daling gidala diha sa Talisay District Hospital apan tungod sa ilang kahimtang gibalhin sa Cebu City Medical Center niining dakbayan.

Si Hornales sa pakighinabi niini sa Banat News kagahapon sa buntag nagkanayon nga walay rehistro ang nahisgutang sakyanan diin gipaubos kini sa pag-testing tungod kay sobra sa duha ka buwan na kining wala magamit.

Ang sakyanan mitakilid dihang ang crane niini nga kargahan sa tawo nga maoy mosusi kung duna bay liki ang tulay mibalikos paingon sa ilawom sa tulay.

Sa maong insidente sobra sa duha ka oras nabalda ang trapiko diha sa nahisgutang lugar ug mga alas 9:00 na sa gabii nabalik sa pwesto ang sakyanan human kini bunlota sa laing crane ug bulldozer.

Si Hornales midungag nga nangapahak ang tulay sa mao usab nga insidente.