Gikonbikto sa korte og gipahamtangan sa pagkabilanggo sa tibuok kinabuhi ang usa ka lalaki nga napamatud-ang mamaligyaay og gidiling drugas sa dakbayan sa Sugbu.
Si Regional Trial Court (RTC) Branch 58 Judge Gabriel Englis nipahamtang og silot nga life imprisonment batok kang Rolando Ceniza,51, molupyo sa barangay Pasil.
Gawas niini gimanduan pa usab sa korte si Ceniza nga pabayron og multa nga mokabat ngadto sa P500 mil.
Subay sa desisyon ni Judge Englis kagahapon napamatud-an sad-an ang akusado sa pagpamaligya og gidiling drugas nga kalapasan sa Art. 5 Section 2 sa Akta Republika 9165.
Si Ceniza gidakop sa kapulisan niadtong nilabay’ng tuig subay sa warrant of arrest nga giluwatan sa sala ni Judge Englis.
Nakuha gikan sa posisyon ni Ceniza sa maong pagpangronda ang lain- laing plastic nga dunay sulod nga shabu nga gibanabanang moabot ngadto sa 30 gramos apil na niini ang mga drug paraphernalia ug salapi nga P15 mil nga gituohang halin sa maong drugas.
Ang maong mga nasakmit nga ebidensya gi-presentar sa korte ug dako ang pagsalig sa korte sa merito sa kaso batok sa suspek.