Usa ka estudyante sa night high school sa Gothong Memorial High School diha sa dalan C. Padilla, Barangay San Nicolas niining dakbayan ang midunggab og gunting ngadto sa iyang schoolmate human ang biktima mibugal-bugal ug mipental og white ink ngadto sa nawong sa suspetsado niadtong Martes sa gabii diha sulod sa campus sa maong tunghaan.
Ang suspetsado giila sa kapolisan nga si Leonardo Sarsaba, 24-anyos, first year section-10, taga Sitio Tinabay, Barangay Alaska, Mambaling niining siyudad.
Ang biktima mao si Allen Caballero, 19-anyos, first year section-6, taga Sitio Galili, Barangay Duljo, Fatima niini usab nga dakbayan kinsa nakaangkon og samad dinunggaban sa walang bahin sa liog ubos sa dunggan ang daling gidala diha sa Cebu City Memorial Medical Center (CCMC).
Si Sarsaba misurender ngadto sa ilang prinsipal nga si Gliceria Bonghanoy human sa maong hitabo.
Base sa imbestigasyon ni PO2 Geofrey Agutual sa homicide section sa Cebu City Police Office (CCPO) nga ang maong insidente nahitabo atol sa recess, si Sarsaba miadto sa classroom nila ni Caballero aron imbitahon ang classmate sa biktima nga si Erlyn Deliña og snacks apan wala tagda ni Deliña si Sarsaba tungod kay busy kini sa pagbuhat sa iyang project.
Gibugal-bugalan ni Caballero si Sarsaba atubangan sa uban niyang mga classmate ug gipintalan pa og white ink ang nawong niini hinungdan nga sa kauwaw ug kasuko sa suspetsado mihuwam kini og gunting sa ilang maestra nga maoy gigamit sa pagpanunggab.
Si Sarsaba nagtingkagol karon diha sa detention cell sa CCPO.