Ang chairman sa committee on social services sa konseho sa dakbayan sa Sugbu, Konsehal Gerardo Carillo mopalabang og ordinansahon atol sa sesyon sa konseho sunod semana nga magdeklarar isip “Socialized Housing Site” ang luna diha sa Central Command (Centcom) sa Apas nga gipanag-iya sa kagamhanan sa probinsya sa Sugbu.
Gibutyag ni Carillo nga tuyo nila nga dili na mahinginlan gikan sa maong lugar ang libo-an ka mga pamilya nga benepisyaryo sa socialized housing program sa probinsya sa Sugbu.
Nasayran nga si Gobernador Gwendolyn Garcia mipadayag na sa iyang lakang pagbawi sa maong luna apil na ang luna nga nahimutangan sa Centcom tungod kay plano kining tukoran og mga proyekto sa Kapitolyo human napakyas ang mga benepisyaryo pagbayad sa data-data nga paagi sa maong luna sa probinsya nga ila karong gi-okupahan.
Apan gipasabot ni Carillo nga subay sa Akta Republika 7279 dunay gahum ang dakbayan sa Sugbu pag-reclassify sa tanang mga luna nga subject sa socialized housing program dinhi sa dakbayan bisan paman og ang maong mga luna gipanag-iya pa kini sa nasudnong kagamhanan o probinsya sa Sugbu.
Gibutyag ni Carillo nga higayon na aron makaangkon og kaugalingong luna ang mga urban poor sa maong lugar ug iya usab nga gipasalig nga ang siyudad na maoy moabaga sa bayranan nga utang sa maong mga pamilya ngadto sa Kapitolyo ug ang siyudad na usab ang mohinayhinay og pangolekta sa datadata nga bayad gikan sa mga benepisyaryo.
Matud ni Carillo karon lang nila nahunahunaan ang pagpalabang og ordinansahon aron magdeklarar nga socialized housing site ang maong lugar tungod kay nagtuo sila nga masulbad ra ang maong problema kun nadayon pa ang negosasyon sa land swap tali nila ni Mayor Tomas Osmeña ug Garcia.
Si Osmeña una nang mimando sa konseho nga mopalabang og ordinansahon nga magpahigayon og re-zoning aron madeklarar nga residential areas ang maong lugar diha sa Centcom.
Si Capitol consultant on information and communication Rory Jon Sepulveda sa iyang bahin nagkanayon nga dili angayang “bias” si Osmeña sa plano sa Kapitolyo sa luna sa Apas tungod kay matud niya gilantaw usab nila ang kahimtang sa mga urban poor sa maong lugar.
Gidugang niini nga dili usab “magsakit ang tiyan” sa mga opisyal sa Kapitolyo kun dili makigtagbo kanila ang mga residente sa Apas tungod kay mag-agad sila ni Osmeña.
Giklaro ni Sepulveda nga adunay bendisyon sa presidente ang laraw ni Garcia nga pagbawi sa luna diha sa Apas aron kabutangan kini og mga komersiyal nga mga establisamento.