Piniriso gibuhian, wa ikiha; hepe pa-imbestigahan sa CIIB

Pa-imbestigahan ang hepe sa Mabolo Police Station human mi-release sa duha ka dinakpan sa miaging semana.

Si Cebu City Police Office Acting Director Sr. Supt. Patrocinio Comendador mimando ni Criminal Investigation and Intelligence Bureau (CIIB) Chief Sr. Insp. George Ylanan nga imbestigahan si Supt. Armando Radoc nganong gi-release niini silang Gertrudes Comeros ug Mary Ann Lariosa.

Si Comeros nadakpan niadtong Hulyo 27, 2007 tungod sa kasong obstruction of justice, direct assault, ug physical injuries human kini mibabag ug namunal og polis sa dihang gidakop ang iyang anak nga si Aldwin Abellana pinaagi sa warrant of arrest tungod sa kasong robbery didto sa Sitio Tarcum, Busay.

Nahibaw-an ang pagbuhi ni Radoc nga walay kasong gipasaka batok ni Comeros sa dihang gihimoan og special report ni Punta Princesa Police Station Chief Anecito Perandos nga ang dinakpan sa iyang deputy nga si Insp. Juanito Pajantoy nakabuhi na nga wala ikiha.

Si Comeros gi-turn-over ni Pajantoy sa Mabolo Police Station pinaagi ni SPO3 Raul Magdadaro aron pasakaan og kaso, apan sa dihang nahibalik si Pajantoy sa Mabolo Police Station, wala na sa detention cell si Comeros ug nasota nga wala sa blotter ang pagkasikop niini. Si Abellana nga anak ni Comeros pabiling gitanggong.

Si Lariosa usab gipabuhian ni Radoc nga wala masang-at ang kasong vagrancy.