Neuro-test sa mga PDE applicants gisibog -- Oaminal
Gisibog sa Philippine Drugs Enforcement Agency (PDEA) ang neuro-examination sa mga nakapasar nga aplikante pagka- ahente niini karon untang semana.
Daling gipahibalo ni Atty. Paul Clarence Oaminal, legal counsel sa PDEA-7 nga tungod kini kay dili pa preparado pagkakaron ang service provider alang sa pagpahigayon sa neuro exam.
Matud ni Oaminal, si Assistant Secretary Baltazar Balangawan, deputy for administration sa PDEA maoy personal nga mitawag kaniya sa telepono ug nipahibalo sa pag-postpone sa maong eksaminasyon ngadto na sa Agosto 12, Domingo.
Matud ni Oaminal kadtong mga nakapasar nga aplikante mataktak gihapon kini sa lista kun ugaling mahagbung sa neuro test.
Human sa maong eksaminasyon, isunod dayon ang pagpahigayon sa medical exam nga maoy katapusang proseso pagdawat niadtong mga aplikante sa pagka-PDEA agent.
Samtang giklaro sab ni Oaminal nga dili singko mil kun dili 600 lang ang tanang aplikante pagka PDEA-agent ang dawaton karong tuiga gumikan kini sa gamay rang pundo nga giaprobahan sa Department of Budget and Management (DBM) alang sa pagpang-hire og mga PDEA agent.
Laing gipahibalo ni Oaminal ang plano nila nga mao ang pagtukod og Satellite Academy sa PDEA dinhi sa Sugbu aron madali og direkta ang processing sa mga aplikante pagka-ahente sa PDEA dinhi sa rehiyon.
- Latest
- Trending
