Usa ka professional nga gikan nagtrabaho sa gawas sa nasud nga lumad nga molupyo dinhi sa dakbayan sa Sugbu ang labing ulahing nataptan sa Human Immuno Defeciency Virus (HIV) karung tuiga.
Gibutyag ni Dr. Rene Josef Bullecer sa AIDS Free Philippines nga ang maong lalaki gipaubos karon nila sa counselling matag karon ug unya human kini masuta nga positibo sa HIV.
Ang maong sakit maoy hinungdan nganong wala na mobalik sa gawas sa nasud pagpanarbaho ang maong pasyente.
Matud ni Bullecer nga upat ka tuig nga nanarbaho didto sa Amerika ang maong pasyente human sa paggradwar niini sa usa ka inilang unibersidad dinhi sa dakbayan apan sa pagpauli niini niadto lang bulan sa Mayo diha pa nadiskobrihe nga positibo na kini saHIV.
Wala pa hinuon matino kun didto ba niya makuha ang maong sakit sa Amerika atol sa iyang upat ka tuig nga pagpanarbaho didto gumikan kay mitug-an kini nga daan nang “sexually active” dihang nagtungha pa sa kolehiyo dinhi sa dakbayan.
Ang maong pasyente maoy ika-157 na nga mga Sugbuanon nga nataptan sa HIV dinhi sa Sugbu nga maoy nahimutang karon sa ika-upat nga dapit dinhi sa nasud nga dunay labing daghan nga mga kaso sa HIV positive lukop nasud.