Daghang kulang sa MCPO kit-an atol sa pre-AGI

Ang Pre-Annual General Inspections sa Mandaue City Police Office (MCPO) nakita nga daghang kakulangan ug problema sa mga kagamitan ug kahimtang sa mga police station sa dakbayan sa Mandaue.

Matud pa ni MCPO Director Sr. Supt. Alexander Abadinas nga dako ang iyang kalipay nga sa gihimong duha ka adlaw nga pre-AGI sa iyang command, ang mga sakop sa Operational Readiness Security Inspection Team Evaluation (ORSITE) nga gipangulohan ni Supt. Melvin Gayotin sa RIID-7 ug Sr. Insp. Claro Binatero sa RIAS   mihatag kanila og “very satisfactory” nga grado.

Apan gibawi kini sa daghang komentaryo sa mga sakop sa ORSITE Inspectors sa unom niya ka mga police substations sa MCPO.

Base sa nakita sa mga inspektor nga kulang sa armas ug sakyanan ang tanang police stations sa maong dakbayan, ingon man sa tawo.

Ang kabaho sa Station 1 gumikan kay nahimutang kini sa kanhi merkado nga nasunog nakit-an usab. Ang station 1, 2, 3, 4 ug 6 way kaugalingong police station ug nagsalig kini sa mga barangay hall sa ilang areas.

Gumikan niini, iyang gihangyo ang mga inspektor nga katabangan sila sa maong mga suliran ug gani si Supt. Abadinas mihangyo na ngadto kang Mandaue City Mayor Jonas Cortes sa maong problema gumikan kay kun ang PNP central office lang ang saligan dili gyud kini makasarang sa maong mga panginahanglanon sa kinatibuk-ang PNP sa nasud.