NBI-7 wa kasulbad sa vigilante killing gisaway

Nasagmuyo ang kahugpungan sa mga manlalaban dinhi sa Sugbu  ngadto sa National Bureau of Investigation (NBI-7) gumikan sa kapakyas niini og resolbar sa mga nahitabong vigilante killings dinhi sa dakbayan ug probinsya sa Sugbu.

Mao kini  gipadayag sa kanhi presidente sa Integrated Bar of the Philippines IBP-Cebu City Chapter Atty. Alex Tolentino dihang nahinabi sa mga tigbalita.

Gibutyag ni  Tolentino  nga gihimo na niya ang tanan ilabi na niadtong siya pa ang presidente sa IBP nga mao ang paghatag sa tanang impormasyon ug ebidensiya nga ilang nahipos batok sa mga nahitabung vigilante killings dinhi sa dakbayan.

Apan iyang gikasagmuyo tungod kay hangtod karong panahona wala pa gyud siyay nakitang kalambuan nga nagpakita og kasulbaran sa maong mga panghitabo.

Gipadayag ni Tolentino nga gikan pa niadtong panahon sa martial law sa kanhi rehiming Marcos hangtod karon wala gyud siya makamatikod nga dunay mga vigilante killings nga nasulbad sa kapolisan.

Bisan pa man niini nanghinaot gihapon si  Tolentino nga atimanon ug resolbahon sa kapolisan ug NBI ang vigilante killings aron mahatagan sa hustisya ang mga pamilya sa nga biktima.

Ang NBI mihimo og linaing imbestigasyon sa maong panghitabo sa dihang misiaw og maayo ang vigilante killings dinhi sa dakbayan niadtong milabay’ng mga bulan.