Gihatagan og pasidungog sa hepe sa Cebu City Police Office ang polis sa Mabolo kinsa nakadakop sa usa ka isnatser nga misuway og dunggab sa iyang biktima ug ingon man diriyot usab dunggaba ang usa ka TV reporter kapin usa ka semana na ang nakalabay.
Ang gipasidunggan giilang si PO2 Nestor Jayma Daclison, sakop sa Mabolo police station kinsa niadtong tungura padulong mosimba uban sa iyang asawa diha sa simbalan sa Sto.Niño.
Ang insidente nahitabo niadtong Hulyo 22 sa hapon diin usa ka Margie Sanchez, nga kasamtangang naglakaw diha sa dalan Osmeña Blvd. ang gi-isnatsan sa suspek nga si Ramil Manatad.
Si Manatad malampusong nakakuha sa Chinese gold nga kwintas ni Sanchez, apan migukod ang biktima ug nagpakitabang sa mga tawo hinungdan sa nahitabong ginukdanay.
Si Manatad gisuwayan pa og sikop sa duha ka mga traffic enforcers diha sa dapit apan mibunot kini og kutsilyo ug giwisi-wisi ngadto kanila ingon man sa mga tawong miapil og gukod.
Ang TV reporter nga si Jonalyn Jumabes sa CCTN kinsa padulong mosimba niadtong tungura ug mao pay pagkanaog sa jeepney giwara-warahan og kutsilyo ni Manatad apan ang maong tigbalita daling midagan sa luyo sa taxi.
Si Manatad diha na makorner sa dalan Lincoln niadtong tungura dihang si Daclison miapil og gukod human makamatikod sa komosyon.
Gidemalas si Manatad dihang ang mga estambay pagkasayod nga usa siya ka esnatser daling mikuninit kaniya hinungdan sa dakong samad sa iyang ulo nga nagkinahanglan pa og pito ka tahi.
Matud pang Sr.Supt. Patrocinio Comendador, hepe sa CCPO, angayang pasidunggan ang mga maayong buhat sa mga polis gamay man o dako aron kapanaminan sa uban.
Kini usab aron madasig ang ubang mga polis sa paghimo sa ilang trabaho.