Naanod nga bata gilaumang buhi

Malaumon gihapon ang kapolisan sa Minglanilla nga buhi pa ang 3 anyos nga batang babaye nga gianod sa baha duha ka adlaw na ang nakalabay diha sa sapa sa barangay Guindaruhan sa maong lungsod.

Una nang gituuhang patay na gyud ang maong bata sanglit ang mismong igsuon niini nga si Miriam napalgang patay pipila ka oras human sa hitabo, apan si Parame wala pa gihapon makit-i.

Kapin sa duha na ka adlaw ang gihimong search and rescue operation sa kapulisan inabagan sa mga kapitan sa tulo ka barangay sa Guindaruhan, Tungkop ug Tulay.

Mismo gani ang kapitan sa Inuburan Naga Sugbu nga si Narciso “Boy” Tablate kinsa team leader sa rescue team sa mga barangay sa Naga miayuda na sa pagpangita sa bata.

Si SPO3 Remegio Elacion sa Minglanilla Police nga nahinabi sa Banat News kagahapon sa hapon mibutyag nga padayon pa gihapon ang search and rescue operation.

“Nanghinaot lang mi nga buhi pa ning bataa, ang amo lang nga buhi pa unta o ba kaha mapalgan nalang unta siya (Parame),” asoy pang Elacion.

Si Parame gibala ni Miriam niadtong tungura samtang nanabok sa sapa uban sa ilang inahan dihang kalit nga misaka ang bul-og sa tubig baha gikan sa bukid ug silang duha gianod.