Nagkugos og bata gidunggab

Lalaking nagkugos og uno anyos nga pag-umangkon kalit nga gidunggab makadaghang higayon sa tawong nagsakay og motorsiklo niadtong Domingo sa hapon sa dalan Jakosalem sa barangay Cogon-Ramos ning dakbayan.

Ang nadunggaban giilang si Bambalini Dumayday, 34, residente sa atbang sa Bayan Tel sa nahisgutang lugar samtang ang suspek nga midunggab kaniya giilang si Joel Llaguno, taga dalan F.Ramos sa samang barangay.

Sa imbestigasyon ni SPO2 Rey Cuyos sa Homicide Section ang biktima kasamtangang nagbarog sa nahisgutang dapit ug nagkugos sa iyang pag-umangkon dihang miabot ang suspek sakay sa usa ka motorsiklo nga gimaneho og wala mailhing tawo.

Ang suspek kalit lang mibunot og kutsilyo ug gidunggab ang biktima makadaghang higayon hinungdan sa pagkalup-og niini apan dihang iyang gibutang sa ubos ang pag-umangkon nailogan niya sa kutsilyo ang suspek.

Usa ka tindero diha sa daplin sa dalan nga si Danilo Damolo,53, kinsa nakakita sa insidente daling miduol aron tabangan ang biktima apan ang suspek daling nisakay sa motor ug mieskapo.

Matud pa sa biktima niadtong tuig 2003, mao gihapong suspek ang mipusil kaniya sa walay igong hinungdan. Si Dumayday kasamtangang nagpaalim sa tambalanan karon.