Gipasanginlan nga nanglugos sa duha ka anak nga babaye sa iyang kapuyo gidakop kagahapon sa buntag sa kapolisan sa Presinto 1 sa Centro, Mandaue.
Ang suspetsado mao si Noel Jenoria, 30, ulitawo nga nalakip sa biktima sa sunog sa Mantuyong sa miaging Marso niining tuiga.
Si PO1 Arthur Cuyos nga gikahinabi sa Banat News miingon nga ang suspetsado ilang nadakpan sa hot pursuit operation nga ilang gihimo sa miaging gabii.
Gireklamo sa duha ka mga batang babaye nga 7 ug 3-anyos nga ang suspetsado mihubo kanila sa ilang sapot sa matag gabii nga sila lamang ang mahibilin sa ilang gipuy-an nga tulda.
Si PO1 Pearl Ann Flores sa Women’s Desk sa Police Station 1 maoy nagdala sa mga biktima sa Vicente Sotto Memorial Medical Center alang sa pagpaubos sa medical check up.
Matud pa ni PO1 Cuyos kun positibo ang resulta sa medical check up maoy ilang isunod ang pagpasaka og kaso nga pagpanglugos ug kasong child abuse batok sa suspetsado nga gitanggong karon sa detention cell.