Nagtan-aw og basketbol gipatay sa kontra

Patay ang usa ka lalaki human kini dunggaba sa iyang gikakontra samtang kini nagtan-aw og basketbol diha sa basketball court sa sitio San Roque sa barangay Luz niadtong milabay’ng Sabado sa kaadlawon.

Ang namatay giilang si Jechorias Gador alyas Vicvic,33, residente sa sitio Lubi sa nahisgutang barangay kinsa giingong midayo diha sa maong dapit.

Samtang ang suspek giila lang sa kapolisan nga si Ronron Capin, residente sa maong dapit kinsa gikatahong gikaaway sa biktima ning bag-uhay lang.

Sa imbestigasyon ni PO3 Henry Orbiso sa Homicide Section, ang biktima kasamtangang naglingkod-lingkod duol sa basketbolan dihang kalit nga miabot ang suspek nga armado og kutsilyo.

Ang biktima wala makabantay dihang kalit kining gihansakan sa suspek ug kutsilyo diha sa dughan ug daling midagan palayo sa dapit.

Gidala sa mga residente ang biktima ngadto sa Vicente Sotto Memorial Medical Center apan gideklarar kining dead on arrival sa mga mananambal.

Ang kapolisan nga miresponde sa lugar nakarekober og duha ka mga kutsilyo diha sa crime scene, usa niini gituuhang maoy gigamit sa pagpatay samtang usa ka indian pana ug lima ka uhas niini ang gi-turn-over sa barangay tanod nga si Manolito Gilamon sa maong barangay.

Padayon pa karon ang kapolisan sa pagpangita sa suspek ug pagtino sa hinungdan sa ilang panag-away nga gituuhan karong maoy motibo sa pagpatay.