Aksidente ug dili tinuyo ang nahitabong dakong sunog sa Jaime Compound, Tipolo, Mandaue niadtong miaging adlaw.
Mao kini gibutyag ni Mandaue City Fire Marshal Chief Insp. Oscar Mayol dihang nahinabi sa Banat News.
Gibutyag ni Mayol nga dunay dili mominos unom ka mga saksi ang nakuhaan nila og pamahayag nga nagbutyag nga didto magsugod ang kalayo sa kusina sa giabangang lawak sa usa ka Liling Cotihal nga gipanag-iya ni Roger Cartagena.
Matud sa maong mga nakasaksi dunay naglung-ag sa maong kusina niadtong higayona apan gibiyaan nga maoy ilang gituohan nga hinungdan sa sunog nga daling mikaylap sa mga sikbit nga panimalay nga hinimo lang sa mga light materials.
Hinuon gitakdang ipatawag sa Mandaue City Fire Department karong buntag ang maong unom ka mga saksi ingon man si Cotihal aron kuhaan og mga pamahayag sa nakit-an sa hitabo nga maoy basehan nila sa pagpadayon sa imbestigasyon.
Nunot niini, gikonpirmar ni Mayol nga gibanabana nila nga moabot ngadto sa P2.8 milyones kapin kun kulang ang kinatibuk-ang danyos sa 256 ka mga panimalay nga gihurot og lamoy sa kalayo.
Samtang luwas na usab ang duha ka mga naangol human maka-angkon og first degree burn nga mao ang usa ka 11 anyos nga batang lalaki nga si Jolito Ybañez ug ingon man ang 40 anyos nga si Leonardo Espanto.
Nasayran nga gipaubos sa general alarm ang maong sunog kapin sa oras human madawat sa kabomberohan ang alarma alas 8:18 sa buntag aron matabangan dayon kini og sumpo nga dili na makakaylap sa ubang sikbit nga mga panimalay
Nunot niini, gipaubos ang dakbayan sa state of calamity ang Jaime Compound ug Espina Compound subay sa resolusyon sa konseho sa dakbayan human sa gisumiter nga resolusyon sa mga sakop sa City disaster and coordinating council nga gipangulohan ni Mayor Jonas Cortes isip chairman.
Si Cortes gihatagan og pagtugot sa Konseho nga mopagawas og salapi alang sa mga biktima sa sunog nga gibana-banang mokabat sa 800 ka pamilya.
Samtang mipagawas na usab og pundong P200,000 sa calamity fund ang barangay Tipolo pinangulohan ni Kapitan Restito Villanueva aron ipamalit og mga materyales aron gamiton sa pagtukod og balik sa mga panimalay sa nasunogan.