Lalis sa pamarbas miuli sa pinatyanay

Gumikan lang sa panaglalis kabahin sa shave kun pamarbas gitabangan og dunggab hangtud mamatay sa magsuong silingan ang usa ka taho vendor human usa kanila ang gikasab-an sa biktima niadtong milabay’ng gabii sa sitio Villa Bulsita sa Bulacao-Pardo.

Giila ang namatay mao si Rey Patayatay, alyas Dodong, lumad nga taga barangay Uling lungsod sa Naga gumikan sa daghang samad dinunggaban nga naangkon diha sa iyang kalawasan.

Samtang gitumbok nga midunggab kaniya apan daling nakaikyas mao ang magsuong naila lang sa mga pangalan nga Junjun ug igsuon niining si Adonis Gioca, pulos mga taho vendor ug silingan sa biktima.

Sa imbestigasyon sa grupo ni PO3 Henry Orbiso sa Homicide Section nasuta gikan sa testigo nga sayo pa niana nasuko og maayo ang biktima ngadto kang Junjun.

Kini gumikan sa paggamit niini sa shave kun pamarbas ug t-shirt ni Patayatay nga walay pananghid ug giingong wala kini ampingi paggamit hinungdan sa iyang kasuko.

Gikomprontase sa biktima ang suspek apan gikatahong nasuko kini ug nagpalaban sa iyang igsuong si Adonis.

Ang biktima dihang nakit-an sa mga suspek diha sa daplin sa dalan kalit nila kining gihamagan ug gitabangan og dunggab makadaghang higayon sa nagkadaiyang parte sa kalawasan hangtud nga nalup-og kini sa dalan.

Ang mga suspek daling mibiya sa dapit samtang gibiyaan ang biktimang nagbuy-od na diha sa daplin sa dalan.