Kilusang Mayo Uno mag-rally sa Agosto 13, 21

Usa ka halapad nga lihok-protesta lukop nasud himuon sa mga sakop sa Kilusang Mayo Uno (KMU) karong Agosto 13 ug 21 subay ning pagpatuman sa nasud sa Human Security Act.

Si Wennie Badayos, secretary general sa KMU-Central Visayas miingon nga ang lihok-protesta sa Agosto 13 ipahinungod sa ilang mga kaubang nangahanaw niadtong Agosto 13, 1981 ug gituohang gipanakop sa militar sa dihang gipatuman ni kanhi diktador Ferdinand Marcos ang martial law.

Matud pa ni Badayos nga ang lihok-protesta sa Agosto 21 ipahinungod ngadto kang kanhi Senador Benigno Aquino Jr. nga gipatay  gumikan sa iyang pagsupak sa diktadoriyang Marcos.

Gipasabot niini nga ang maong duha ka lihok-protesta magsentro sa pagpahinumdum niadtong nabiktima sa niluog nga kalihukan sa militar ug magsentro sa bag-ohay pa’ng napatuman sa kagamhanan nga anti-terror law nga giisip nilang hulga sa katilingban.

Iyang giklaro nga ang ilang lihok-protesta magpadayon hangtod karong Disyembre ning tuiga gumikan sa ilang pagsupak sa maong balaod.

Gawas pa niini, dili usab nila ihunong ang mga sunodsunod nga mga diskusyon sa ilang mga chapter ingon man sa mga komunidad nga mapasabot gyud ang tinuoray nga epekto sa maong balaod ikomparar sa martial law.