Kuhaan sa iyang armas ug chapa ang usa ka polis nga gitumbok sa usa ka babaye nga maoy nangilkil ug mipusil kaniya sa milabay’ng duha ka semana.
Ang ipaubos sa camp restriction ug dis-armahan mao si PO2 Dante Villacarlos nga nadestino sa presinto 5 sa Lapulapu.
Matud pa ni Lapulapu City Police Chief Supt. Louie Oppus bisan pa nga miatras sa kaso ang babayeng biktima apan dili makalingkawas sa kasong administratiba si PO2 Villacarlos.
Si Oppus miingon nga ang ngalan sa Lapulapu City Police Office ang naulawan sa pagpangilkil ni PO2 Villacarlos ug dili kini angayang palabyon aron maleksiyon ang tanang mga polis nga badlongon.
Si PO2 Villacarlos sa pagkakaron anaa pa sa iyang pagpaalim sa iyang samad nga nahiaguman sulod sa duha ka semana base sa rekomendasyon sa doktor ug kun kini mapupos na atol unya sa pagreport sa polis kinahanglan nga iyang isurender ang iyang service firearms ug police badge.
Na-ospital si PO2 Villacarlos gumikan sa iyang pagkapandol sa motorsiklo nga gimaneho sa unang taytayan sa Mandaue ug Lapulapu paingong sibat human siya mangilkil sa babaye kang kansang tugkaran giduwaan og hantak.