Magpabilin sa iyang puwesto si Lapulapu City Police Chief Supt. Louie Oppus bisan pa og highly urbanized city na ang Lapulapu.
Kini ang tinguha sa kadagkoan sa kagamhanang lokal sa dakbayan sa Lapulapu.
Matud pa ni Lapulapu City Administrator Teodolo Ybañez, posibleng si Supt. Oppus pa gihapon ang magpabiling hepe sa Lapulapu gumikan kay ilang nasayran nga gilihok na karon ni Oppus ang iyang mga papeles alang sa iyang promosyon pagka-senior superintendent.
Matud pa ni Ybañez nga maayo ang gipakita nga performance ni Oppus sa Lapulapu hinungdan nga ila gyud nga himuon ang mga pamaagi nga magpabilin kini sa puwesto.
Sa pagkakaron wala pay miabot nga mga ngalan sa posibleng mohulip ni Oppus nga gikan sa kadagkoan sa Police Regional Office.
Subay niini, si Oppus nga nahinabi sa Banat News mipadayag sa iyang dakong pasalamat sa kadagkuan sa kagamhanang lokal sa Lapulapu gumikan sa ilang pagsalig ug suporta ngadto sa iyang pagdumala sa kuwerpo sa kapolisan.
“As a good soldier, I will follow my superior,” sumala pa ni Oppus kun ugaling siya hulipan base sa lagda sa PNP nga kinahanglan nga usa ka senior superintendent ang angayan nga modala sa usa ka highly urbanized city sama sa Lapulapu.
Ang Lapulapu bag-o lang nahimong highly urbanized city niadtong milabay’ng Domingo.
Matud pa ni Oppus nga bugtong Ombudsman clearance na lang ang iyang kulang sa iyang gisang-at nga mga papeles alang sa iyang promosyon ngadto sa Kampo Crame niadto pang 2004.
Si Oppus miingon nga aduna pa siyay 14 ka mga kaso sa Ombudsman nga iyang giatubang ug kini mao ang mga kaso sa nahitabong kagubot sa rally didto sa Basak, Lapulapu diin lakip si Kapitan Isabelito Darnayla ang mikiha kaniya.