Mituasik ang utok sa usa ka wala mailhing tawo human kini pusila sa wala usab hiilhing mamumuno alas 3 pasado ang takna sa miaging kaadlawon sa sitio Abra, barangay Alang-Alang, dakbayan sa Mandaue.
Ang biktima nga wala hiilhi ang gibana-bana nga anaa sa panuigon nga 30 kapin o paubos ug kasarangan lamang ang gidak-on sa panglawas niini.
Si PO1 Pearl Ann Flores nga gikahinabi sa Banat News miingon walay nakakita sa pagpamusil apan ang mga residente nakadungog nalang og buto sa armas.
Ang biktima dunay usa ka samad pinusilan sa ulo nga nakaingon sa hinanali niining kamatayon, usa ka basiyo sa kalibre 45 ang napalgan diha sa crime scene sa grupo ni SPO1 Pedro Sucion nga maoy imbestigador nga nakatubag sa maong alarma.
Ang patay’ng lawas sa biktima gidala sa Rolling Hills Funeral Homes sa dalan A.S. Fortuna sa Banilad, dakbayan sa Mandaue alang sa pagpaawtopsiya niini.
Dugang pa ni SPO1 Sucion nga ang biktima kinsa nagsul-ob puti nga t-shirt, yellow nga purol ug gituohang sakop sa Akrho base sa nakitang dakong ulat sa paso diha sa tuong pulsuhan niini nga maoy sagad nga ritual mark sa Akrho.