Shari’a court sa Cebu gihangop sa mga Muslim

Gihangop sa kahugpungan sa mga Muslim ang laraw nga pagbutang og kaugalingong korte niini dinhi sa Sugbu nga gitawag og Shari’a Court.

Mitumaw kining maong laraw atol sa milabay’ng tulo ka adlaw nga seminar workshop sa tanang mga huwes sa Regional Trial Court (RTC) niadtong miaging semana.

Gibasehan niini ang nagkadaghan nga mga Muslim nga ania na karon manimuyo dinhi sa Central Visayas ilabi na gyud sa Sugbu diin subay sa rekord gikan sa Office of the Muslim Affairs (OMA) gibana banang moabot na og 300 mil ang mga Muslim nga ania magpuyo karon dinhi sa rehiyon.

Ang kanhi chairman sa Metro Cebu Muslim Peace and Order Council Hadji Nashier Ismael mipadayag nga dugay na nilang gipangandoy nga mabutangan og Shari’a court dinhi sa Sugbu gumikan kay matud niya hasol kaayo ug dako pang gasto ang ilang paglarga paingon sa Mindanao sa higayon nga duna silay ipasaka nga kaso o ba kaha kaso nga ilang atubangon gumikan kay atua lang sa maong lugar mahimutang ang korte sa mga Muslim.

Nunot niini gipadayag ni Ismael nga gikinahanglan gyud nga usa usab ka Muslim ang matudlong huwes sa Shari’a court gumikan kay mas nasuhito kini sa mga pamalaod sa ilang relihiyon.

Hinuon walay supak si Ismael kun usa ka Kristyano ang matudlong prosecutor sa korte sa Muslim nga tukoron dinhi sa Sugbu basta magtuon lang kini sa Code of Muslim Personal Laws kon Presidential Decree 1083.