Pito ka tawo lakip na niini ang 16 anyos nga batan-ong sakop sa Crips gang ang gipasakaan og kasong murder kagahapon sa mga sakop sa Homicide Section may labot sa pagpatay sa usa ka tinun-an sa dentistry sa Southwestern University niadtong Biyernes.
Ang gipasakaan og kaso mao ang usa ka 16 anyos nga taga P. del Rosario Extension sa Sambag 1 kinsa maoy gitumbok sa uyab sa biktimang si Michael Lumbuan Dogol-dogol nga mao gyuy mipusil sa naulahi.
Samtang gawas sa maong menor edad, giapil sa gipasakaan og kaso mao sila si Jessie Camacho, Tisha Jane Maeirhoffer ug upat pa ka wala mailhing mga kaubanan nga diha sa pagkahitabo.
Sumala pa sa kapolisan dako nga posibilidad nga sinabutan sa grupo ang planong pagpatay sa biktima kinsa niadtong tungura nakit-an pa sa uyab ni Dogol-dogol nga naniid diha sa sulod sa ilang gikan-an sa dalan Urgello sa Sambag-Tumoy sa barangay Sambag 1.
Matud pa sa uyab sa biktima, nadunggan niya ang iyang uyab nga mihunghong sa cashier og “Manong mura man og kontra to nako.” Apan wala lang kini seryosoha sa biktima.
Dihang nahuman sila og pangaon ug nanabok diha sa dalan nakit-an nila si Jessie, Maierhoffer alyas Chabbu nagbarog diha sa daplin sa dalan nga sarkastiko kaayo og ngisi uban ang lima pa ka kaubanan.
Ning tungura, gipangutana sa biktima ang grupo ‘Ok ra mo bay?” ug gitubag kini ni Jessie sa pag-ingon og “Taga diri ra mi bay” ug gitubag nalang kini sa biktima og “Ok.”
Dihang mitalikod na si Dogol-dogol, nalingian sa uyab niini ang upawon nga kaubanan nila ni Jessie nga mibunot og wala matinong kalibre sa armas ug gipusil ang biktima katulo.
Human mahagba si Dogol-dogol daling nanagan ang grupo. Samtang daling gitabang og dala sa Chung Hua Hospital ang biktima apan gideklarar kining dead on arrival.
Diha sa tambalanan, miabot ang mga polis ug gipakitaan og picture sa 16 anyos nga suspek ug positibo niya kining gitumbok nga mao kadtong upaw nga mipusil patay sa iyang uyab.
Ang grupo sa suspek mga miyembro sa Crips Gang samtang ang biktima inactive nga sakop sa Akrho .