Balaga namulong og bakak?

Labihang sukoa sa mga sakop sa Lupong Tagapamayapa sa barangay Parian sa dakbayan sa Sugbu ngadto sa ilang kapitan nga si William Balaga.

Kini tungod kay wala lang sila taktakta sa katungdanan, ang kapitan giingong niluwat pa ug mga bakak nga pamahayag ngadto sa media.

Gitagsatagsa pagtubag sa mga opisyal sa lupon sa Parian ang mga gipasangil ni Balaga ngadto kanila.

Una nang gipadayag sa kapitan nga gibasura sa City DILG ang reklamo sa iyang mga lupon nga nagkwestyon sa ilang pagkatangtang sa serbisyo.

Apan ang presidente sa lupon sa barangay Pari-an nga si Lucita Lazarte mitataw nga wala ibasura ang ilang reklamo kun dili sila maoy wala tungaha sa kapitan atol sa gipatawag nga dialog.

Gani miingon si Lazarte nga nagsige og panawag ang DILG ngadto sa kapitan apan dili kini ma-contact hinungdan nga ila na lang gidangop sa konseho sa siyudad sa Sugbu ang ilang reklamo.

Sa iyang bahin, ang bise presidente sa Lupon nga si Teresita Jumao-as mitataw nga dili unta sila mokwestyon sa ilang pagkatangtang kun ang desisyon gikan mismo sa ilang kapitan.

Gi-revoke ang appointment sa mga sakop sa lupon sa Pari-an tungod kay giingong wala nay pagsalig og kompiyansa ang mga sakop sa konseho sa barangay kanila.

Gikwestiyon usab sa mga sakop sa lupon ang gipangayo sa konseho kanila nga individual report, sa dili paggamit sa opisina human sa office hours ug pagsumiter og agenda sa ilang tigum.

Apan sumala pa ni Jumao-as nga si Konsehal Marianito Rodriguez maoy mihatag kanila og memorandum ug dili ang ilang kapitan mao nga ila kining gikwestyon.

Gawas niini, miingon si Jumao-as nga wala usab sila hatagi og due process sa dihang gitaktak niadtong Hulyo 2, tulo ka adlaw human nadawat nila ang kamandoan.

Apan ang labaw’ng gikalagutan ni Jumao-as ug kaubanan, mao ang paghingalan ni Balaga kanila ug Lupon Tagalibak’.

“The problem with him, usa siya ka leader sa barangay unya  mohimo siya ug ingon niana nga call, ok ra unta if he will let that person to come out to the open and prove, sumala pa ni Jumao-as.

Hinuon ang reklamo nila ni Lazarte, Jumao-as ug kaubanan, gitun-an na karon sa Committee on Barangay Affairs ug sa Committee on Laws sa City Council, gawas sa ilang gipasaka nga reklamo ngadto sa Ombudsman Visayas.