Nagubot ang kalingawan sa sitio Graje sa barangay Guadalupe sa dakbayan sa Carcar dihang usa ka lalaking hubog ang kalit nga midunggab sa iyang ig-agaw sa walay igong hinungdan sa miaging gabii.
Ang biktima giilang si Carlito Gabuya, 31, usa ka drayber sa habal-habal samtang ang gikatahapan giila nga si Edwin Solon , usa ka kargador ug nagpuyo sa samang lugar diin nahitabo ang insidente.
Si PO3 Jorame Tanud-tanud nga gikahinabi sa Banat News nagkanayon nga walay nahitabong panaglalis o away tali sa duruha aron mosampot sa dugoon nga insidente.
Apan sumala pang Tanud-tanud ubos sa ilimnong makahubog ang suspetsado sa dihang kalit niining gidunggab ang biktima kinsa niadtong tungora naglingaw sa pagtan-aw sa duwa nga parlor games sa ilang barangay.
Si Gabuya naigo diha sa tiyan ug daling gidala sa Jesus Paras Memorial Hospital apan sa paghiabot sa maong tambalanan gideklarar kini nga dead on arrival.
Wala na maapsi sa mirespondeng kapolisan ug tanod ang suspek sanglit dali kining miuban sa panon sa nagkatibulaag nga mga tawo.Gipaabot nalang sa kapolisan ang asawa sa biktima aron pormal nga mosang-at og kaso batok sa suspek.
Matud pa ni Tanud-tanud nga wala sila kadungog nga badlungon ang suspetsado sa ilang lugar diin nahitabo ang insidente apan gituuhang posibleng natripan lang niini ang iyang ig-agaw.