Nasikop sa kapolisan sa Lapulapu ang upat ka armado, duha kanila nalambigit sa kasong robbery with homicide sa Kalawisan dakbayan sa Lapulapu sa milabay'ng hapon.
Ang mga dinakpan giilang sila si Felixberto Gelviro Aldamita alyas Mamerto, alyas Junjun, 25, residente sa Guadalupe Carcar; Brando Alesna Babao, 41, taga Villadolid, Carcar; Edmund Macaraeg Punay, 23, residente sa Taboc dakbayan sa Mandaue ug Alwin Gelicaña Bertoldo, 23, lumad sa Mantalungon, Barili.
Ang upat nasakmitan og kalibre .45, .357 ug 38 rebolbers nga pulos dunay mga buhing bala sa Operation Section, TRS ug SWAT team sa dakbayan sa Lapulapu.
Matod pa ni SPO1 Honorato Tano dunay misumbong nga residente kabahin sa mga kadudahan og lihok nga mga tawong nagpuyo diha sa panimalay sa usa ka Allan Berame.
Sa gihimong background checking, nasuta nga si Aldemita ug Babao adunay mga pending warrants of arrest sa kasong Robbery with Murder human kini nalambigit sa pagtulis patay sa negosyante og baboy didto sa Guadalupe lungsod sa Carcar sa milabay'ng tuig.
Samtang si Supt. Paul Labra usab ang Deputy Director for Administration sa CCPO nga miadto sa Lapulapu police ug mitumbok kang Aldamita nga nalambigit sa tulis sa Sugbu.