Nakombikto sa human trafficking

Gikonbikto sa korte ug gipahamtangan og silot nga pagkabilanggo sa tibuok nilang kinabuhi ang mag-live-in partner nga gikasohan og qualified trafficking of persons.

Si Regional Trial Court Branch-14 Judge Rafael Yrastorza nipakanaug sa iyang hukom nga nagpahamtang og life imprisonment batok sa mag-live-in partner nga sila si Roland Suico ug Teresa Castro nga molupyo dinhi sa dakbayan sa Sugbu.

Atol sa promulgation kagahapon sa buntag gimanduan usab sa korte ang mag-live in partner pagbayad og multa nga P3 milyones  sa kadaut nga nahatag niini ngadto sa mga biktima.

Kombinsido ang korte sa kalig-on sa mga ebidensiya nga gipresentar sa habig sa prosekusyon ug gibarugan sab niini ang kabalido sa operasyon sa mga operatiba sa National Bureau of Investigation (NBI) nga maoy nakadakop kanila sa akto.

Nasayran nga gisikop ang mag-live in partner atol sa gilusad nga operasiyon sa NBI niadtong petsa 3 sa bulan sa Disyembre tuig 2004 nga nagbaligya og walo ka babaye alang sa lawasnong kahinam sa usa ka inilang hotel sa uptown Cebu dinhi sa dakbayan niadtong higayona.

Duha sa walo ka mga babaye mga minor de edad ug gi-deal sa kantidad nga tag P1,500  ang matag usa.