Kombinsido ang Regional Director sa National Statistic Office (NSO-7) nga inside job ang nahitabong pagkahanaw sa 223 mil pesos nga koleksyon sa maong ahensiya niadtong petsa 15 sa Hunyo nga kita gikan sa na-isyu niining nagkalainlaing mga certifications.
Gitug-an ni NSO-7 regional director Lilia Tandoc dihang nahinabi sa Banat News nga dunay dili momenos siyam ka mga kawani sa iyang buhatan ang dunay mga access niini ug kini mao ang tulo ka gwardiya nga dunay yawe nga gibahin ngadto sa tulo ka shifting, laing tulo ka kawani nga maoy in-charge paingon sa processing center ug ang laing tulo ka kawani nga maoy gitugyanan sa yawe sa vault.
Sila mao si Felixberto Sato, nga maoy outlet supervisor ug duha ka collecting officers nga sila si Leslie Basula ug Myrna Catalunya.
Matud ni Tandoc iyaha nang nasumiter ang mga pangalan sa maong mga kawani ngadto sa ilang ulohang buhatan nga maoy nagpahigayon sa imbistigasyon sa pagkahanaw sa maong koleksyon.
Gitug-an sab ni Tandoc nga nihimo na usab karon og linaing imbestigasyon ang Commission on Audit (COA) ingon man ang National Bureau of Investigation (NBI) ug pulos inside job ang gitutukan niining anggulo sa maong hitabo.
Gibutyag ni Tandoc nga gipaabot na lang nila karon ang kopya sa resulta sa imbestigasyon nga maoy basihan unya sa pagpasaka og kaso niadtong matumbok nga responsable sa pagkahanaw sa maong kantidad.
Apan giklaro ni Tandoc nga ang NBI maoy mopasaka og kaso ug igo lang silang mokooperar sama sa paghatag og testimoniya kabahin sa dugang impormasiyon may labot sa operasyon sa maong ahensiya.
Wala moklaro si Tandoc kun mao ba kini hinungdan sa dinaliang temporaryong pagpasira sa operasyon sa NSO-7 sulod sa lima ka bulan gumikan kay igo lang siyang nagpatuman sa kamanduan gikan kang NSO Administrator ug Civil Registrar General Carmelita Ericta niadtong milabay’ng Biyernes sa buntag.
Tipik ug kabahin kini sa pagpangandam nga himuon alang sa pagbalhin og buhatan sa NSO-7 didto sa Sudlon Lahug gikan sa gamay ug apiki nga opisina niini karon diha sa M.J. Cuenco Avenue.