Lalaki nga kuyog sa iyang uyab gipusil sa mga tulisan human mosukol diha sa Tingub dakbayan sa Mandaue sa milabay’ng gabii.
Ang biktima mao si Junel Pable, 21, residente sa Opao dakbayan sa Mandaue, samtang duha ka wala mailhing lalaki ang mitulis kanila nga nagluwan og motorsiklo.
Sumala pa ni PO2 Rey Manatad sa Station 4 sa MCPO si Pable mikuha sa iyang uyab sa maong dapit ug samtang naglakaw gisugat kini sa duha ka tawo nga nagsakay og motorsiklo.
Usa kanila ang mikanaog ug miduol sa manag-uyab apan si Pable nakamatikod nang daan sa armas sa tulisan hinungdan nga iya kining gilayog aron mailog ang armas.
Apan ang back-up sa tulisan mipuspos sa ulo ni Pable hinungdan nga ang tulisang dunay armas nakahigayon sa pagpusil kaniya sa diha sa ulo ug bukton.
Si Pable daling gidala sa Mandaue City Hospital samtang ang mga tulisan dali nga nakasibat sa maong dapit.