72 ka polis ‘absinot’ ipatawag

Patubagon ang 72 ka mga polis nga nadestino sa kalungsoran human mapakyas pagtunga sa gipahigayong Oplan Bilang sa National Police Commission (Napolcom) niadtong milabay’ng buwan  nga gihimo diha sa provincial command.

Kini maoy gitug-an ni Cebu Provincial Police Director Sr. Supt. Carmelo Valmoria nga sa 72  ka mga polis lima niini mga opisyal sa kalungsoran.

Matud ni Valmoria sa lima ka opisyal nga wala katambong sa Oplan Bilang niadtong milabay’ng buwan usa niini na-ospital niadtong tungora.

Gustong masayran ni Valmoria ang mga rason sa mga polis nga wala makatambong kay matud niya kasagaran sa ubang polis morason nga sila ni-duty ug ang uban gi-deploy sa laing unit ilabi na sa Sub Task Group sa Bantayan Island hinungdan nga wala sila makaapil.

Apan giklaro ni Valmoria nga sa wala pagtambong niining 72 ka mga polis wala magpasabot nga mga ghost policemen.

 “Naa ni sila pero bisan unsay ilang katarungan o rason nganong wala sila makatambong. Mao ni among susihon,” dugang pa ni Valmoria.

Ang Oplan Bilang tinuig nga bulohaton sa Napolcom aron pagkumparar sa listahan sa kapolisan sa nasud sa aktuwal nga naa sa field.