Patay ang usa ka gipasanginlang sakop sa Akyat Bahay gang human kini mapusili sa polis nga midakop kaniya dihang kini gikatahong misuway og sukol sa maong polis pinaagi sa pagsuway og pusil sa naulahi niadtong milabay’ng Domingo sa gabii.
Ang insidente nahitabo diha sa Happy Valley sa Guadalupe diin ang namatay giilang si George Gabutin,alyas Otong,27, walay klarong address apan kaniadto nagpuyo diha sa Salvador Extension sa Labangon.
Ang nakapusil kaniya mao si PO1 Noriel Luage, residente sa Salvador Extension sa Labangon kinsa sakop sa Criminal Investigation and Intelligence Branch.
Sa imbestigasyon sa Homicide Section nasuta nga usa ka Ariel Marzon ang midangop kang Luage ug misumbong kabahin sa pagpangawat nga nahitabo diha sa ilang lugar diin iyang gitumbok nga suspek mao si Gabutin.
Nunot niini si Luage daling milibot sa lugar ug gipangita si Gabutin hangtud nga iya kining nadakpan diha sa Happy Valley, apan human niya maposasi ang usa ka kamot niini kalit kining milugnot ug midagan.
Diha-diha duna kini gikuot diha sa iyang itom nga backpack nga usa ka .38 paltik nga rebolber dayong pusil ngadto kang Luage apan mikagar ang armas ug wala makabuto hinungdan nga gipusil siya sa polis makausa aron unta baldahon.
Apan walay swerteng naigo ang likod niini hinungdan nga gidali niya kini og hatud sa Cebu City Medical Center apan gideklarar kining dead on arrival.
Si Luage mitahan dayon sa iyang kaugalingon ngadto sa iyang hepe nga si Sr.Insp. George Ylanan ug gisurender ang iyang armas.
Samtang nakuha sa kapolisan diha sa crime scene ang bag nga gisudlan sa pusil sa suspek, ang .38 paltik rebolber niini nga may upat ka buhing bala, usa ka Angle Grinder nga Makita 600W nga giingong iya ni Marzon.
Si Sr. Supt. Patrocinio Comendador nagkanayon nga ilang pasakaan og kasong reckless imprudence resulting to homicide si Luage tungod sa aksidenteng pagkapatay kang Gabutin bisan sa tuyo niining baldahon lang aron madakpan.
Ang igsuon ni Gabutin nga si Amado Gabutin ug asawa niining si Rowena mitug-an sa mga tigbalita nga dili sila mopasaka og kaso batok sa maong polis sanglit badlungon ang ilang igsuon ug kanunay kining mohingos og rugby.
Apan wala sila masayod kung unsa ka tinuod nga misukol kini ug kung duna ba gyud kini armas sanglit ang ilang nahibaw-an mohingos kini og rugby ug mamunitay og lata apan dugay nga milayas sa ilang balay.
Giangkon usab nilang kaduha na mabilanggo si Gabutin tungod sa paghingos og rugby kaniadto.