Comelec gipunsisokan kagahapon

Gipunsisukan sa mga bag-ong botante ang mga buhatan sa Comelec sa dakbayan sa Sugbu kagahapong adlawa.

Kini maoy paghulagway ni Cebu City Election Officer,  Marchel Sarno, atol sa unang adlaw sa registration.

Giklaro ni Sarno nga dili lang regular nga mga botante ang naghugop sa ilang mga buhatan kagahapon, lakip na ang nagpangedaron og 17-anyos paubos.

Kini tungod kay kun  walay kausaban, dungan nga ipahigayon karong Oktubre 29 ang Barangay ug SK elections.

Nangayo na og assistance si Sarno ngadto sa kapolisan sa dakbayan aron maoy motabang pagpalinya niadtong magparehistro.

Gihangop hinuon ni Sarno ang gipakitang kadasig sa mga Sugbuanon nga nagparehistro taliwala  sa kainit kagahapon sa panahon.

Subay sa maong kalambuan, nanawagan gihapon si Sarno sa mga Sugbuanon nga wala pa marehistro nga mudalikyat sa ilang buhatan.

Gipasabot sa election officer nga dili angayang huwaton niini ang deadline sa registration aron dili mosamot paghu-ot ang ilang buhatan.

Nasayran nga usa lang ka semana ang Comelec registration  ug kini gitakdang taposon karong umaabot adlaw nga Domingo.

Gawas sa mga bag-ong botante, giawhag usab ni Sarno nga magparehistro ang wala makabotar sa  miaging duha ka eleksyon aron kini makabutar sa umaabot nga piniliay.

Midugang ang election officer sa pagpahibalo  nga mahimo usab niining higayona ang pag-transfer sa registration record sa usa ka botante nga mobalhin og laing dapit.

Niadtong mga magparehistro gikinahanglan lang ang pagdala sa ilang ID  ug ubang mga identification documents.