Libuang aplikante sa pagkaahente sa PDEA nikuha'g pasulit gahapon

Libuan ka mga aplikante aron mamahimong labing unang batch sa mga agents sa Philippine Drug Enforcement Agency ang mikuha og pasulit kagahapon sa buntag diha sa Abellana National Night High School.

Ang maong pasulit maoy magsilbing entrance qualifying examination alang niadtong mga buot mamahimong ahente sa PDEA nga susama usab ang trabaho sa mga ahente sa National Bureau of Investigation.

Ang Sugbu maoy ikaduhang dunay labing daghan og aplikante sunod sa Manila. Ang officer-in-charge sa PDEA-7 nga si Atty. Jennifer Rosales mipahibalong mopagawas unya sila sa resulta sa eksaminasyon ug kung pila gyud ang nikuha sa maong pasulit.

Apan dinhi pa lang sa Sugbu, duna nay 400 ka mga aplikante nga nagpatala samtang duna say gatusan ka aplikante gikan sa ubang parte sa Visayas.

Ang kanhi director sa PDEA-7 nga si Supt. Amado Marquez sa pakighinabi sa Banat News mitug-an nga ang mga palarang makapasar sa maong pasulit dad-on sa Manila ug ipailawom sa medical, physical checkup, neuro-test ug uban pa.

Sila maoy mamahimong labing unang batch sa PDEA Academy nga naa mahimutang sa Camp Castañeda Silang, Cavite duol sa Philippine National Police Academy.

Ang mga PDEA agent trainees ipailawom sa Drug Enforcement Officer’s Training sulod sa unom ka bulan ug inigkahuman I-deploy sa nagkadaiyang parte sa nasud.

Niadtong Hulyo 4, 2007 subay sa Akta Republika 9165 mapupos na ang kasabutan sa PNP ug PDEA diin ang tanang mga police nga gidestino sa PDEA gipabalik na ngadto sa ilang mga mother unit.

Ang mga aplikante gikinahanglang nag-edad og 21 ngadto sa 40 anyos, gradwado sa upat ka tuig nga kurso, dunay eligibility gikan sa Civil Service Commission o ba kaha pasado sa licensure board exams sama sa Bar ug uban pa.

Show comments