24 oras nga checkpoint

Gipaninguha karon sa Cebu City Police Office nga makab-ot ang 80 porsiyentong pagkunhod sa crime volume sa dakbayan gikan sa natalang 35 porsiyentong pagkunhod niini ning milabayng unom ka buwan ning tuiga kumparar sa milabayng tuig.

Aron makab-ot kini, ang CCPO mopatuman og 24 ka oras nga random checkpoint sa dakbayan sugod ning semanaha .

Ang Criminal Investigation and Intelligence Branch maoy mangulo sa tanang mga special units nga mohimo sa checkpoint sa tibuok adlawan hangtud sa sayong gabii dayon hulipan sila sa mga police stations hangtud na sa kabuntagon.   Nakatala og 46 percent nga pagkunhod sa crime against property, ug 56 porsiyento nga pagkunhod sa theft cases ang CCPO apan misaka og kaso sa pagpanglugos diin mitala kini og 34 ka insidente samtang mikubos usab og 6 porsiyento ang crime against person.

Matud ni Sr. Supt. Patrocinio Comendador kini ang pinakataas nga pagkubos sa statistics sa CCPO sulod pipila na ka tuig sanglit ang labing ubos nga nakab-ot kaniadto 12 porsiyento ra.

“Siguro if we can attain the decline of 80 percent that’s the time we have to relax a bit,” nagkanayon si Comendador.

Tagsa ka oras sa matag presinto ang kinahanglan igahin aron sa paghimo og checkpoint, diha sa upat ka mga dapit nga gitumbok nga crime prone areas.

Diha sa mga checkpoint masugatan ang naghupot og mga iligal nga drugas, carnapped nga mga sakyanan, armadong mga tawo ug bisan na gani mga nagmanehong walay mga lisensya.

Karong unang unom ka bulan ning tuiga kumparar sa milabay'ng tuig, mius-os og maayo ang crime volume nga mitala 56 porsiyentong pagkunhod tungod sa mga pagpanakop ug mga malampusong operasyon batok sa mga kriminalidad.

Usa sa mga nakatampo niini sumala pa sa kapolisan mao ang mga agresibong kampanya pinaagi sa pagtukod sa Anti-Robbery and Thievery Task Force, paggukod sa mga dunay mga warrants of arrest, pagpahigayon sa mga random checkpoints ug night patrols.