Naugdaw ang usa hardware nga tindahan diha sa eskina sa dalan F.Gonzales ug MC Briones sa nahitabong sunog kagahapon sa kaadlawon nga milanat og 55 ka minutos.
Ang maong sunog midanyos og gibana-banang P4.5 milyones sumala pang Cebu Fire Marshal Esmael Codilla sa pakighinabi sa Banat News kagahapon.
Ang sunog nagsugod diha sa silong nga bahin sa upat ka andanang edipisyo nga giukopar sa Ho Tong Hardware nga gipanag-iya ni Jaime Sy.
Matud pang Codilla gikinahanglan niyang iisa sa general alarm ang operasyon tungod sa kabalakang maparehas sa nahitabo sa Lincoln Street sa Carbon market diin diriyot mahurot ang usa ka block sa miulbong sunog.
Ang dakbayan sa Mandaue, Lapulapu, Talisay ug Consolacion daling miresponde sa alarma ug mitabang sa suplay sa tubig. Hinuon wala kaayo problemaha sa kabomberuhan ang kusog nga hangin gawas lang sa kakusog sa kalayo gikan sa maong tindahan.
Sumala pang Codilla posibleng ang mga panindang mga combustible sama sa asyete, motor oil ug mga pintal nga stocks maoy posibleng nakaingon sa kusog kaayong kalayo diha sa sulod.
Ang sunog hingpit nga napawong pasado alas 12 na sa udto kagahapon apan nakontrolar kini gikan sa pagsugod 55 minutos lang.
Walay nasakitan sa maong insidente. Wala pa matino sa mga imbestigador ang hinungdan sa maong sunog.