Tomas di katambong sa Dilaab mass karon

Dili makatambong si mayor Tomas Osmeña sa gitakdang Santos nga Misa karong buntag alang sa mga piniling opisyal sa Sugbu.

Kini tungod kay ang mayor malangay pa sa kaulohan sa gitambungang League of Cities kagahapon.

Ang misa pasiugdahan sa Dilaab Foundation mag-promote sa heroic Christian citizenship gawas sa pag-ampo alang sa mga elected officials.

Kini gitakda karong alas 10 sa buntag diha sa Saint Joseph Parish sa barangay Mabolo ning siyudad diin ang arsobispo sa Sugbu nga si Ricardo Cardinal Vidal maoy mosaulog niini.

Mga tigpaniid nainteres sa nahisgutang misa tungod kay lakip sa giimbitar sa mga nagpasiugda mao si Gobernador Gwendolyn Garcia.

Sayod ang mga Sugbuanon sa dili maayong relasyon sa duha ka opisyal tungod sa pagsinukliay niini ug mga mahait nga pulong.

Gani misampot sa pagpamawi sa mga luna sa lalawigan nga nahimutang dinhi sa dakbayan lakip na niini ang Fuente Osmeña Rotunda.

Nagsugod kini human mabaraw ang sabot-sabot sa duha ka local government unit alang sa pagbinayloay og mga luna.

Giklaro hinuon ni Father Carmelo Diola ang overall coordinating steward sa Dilaab Foundation nga mahinayon ang maong misa bisan wala ang mayor ug ang ubang giimbitar nga mga opisyales.

 Wala hinuon matino kung motambong sad ang gobernadora sa nahisgutang kalihukan.