Wala pautang gidunggab

Negosyante gidunggab kay wala pautang og softdrinks sa silingang hubog diha sa sitio Agus Gamay barangay Agus dakbayan sa Lapulapu sa milabayng gabii. Ang biktima mao si Nicanor Suralta Rodriguez, 44, residente sa maong dapit nga tag-iya og dakong tindahan sa maong dapit.

Giila ni PO3 William Homoc sa Homicide Section ang suspetsado nga si Tomas Gugtai alyas Boyet, silingan sa biktima. Matud pa ni Homoc miadto sa tindahan sa biktima ang suspek ug mihangyong mangutang og softdrink apan mibalibad ang biktima. Pagkagabii niana dihang ni-brownout gipahimuslan sa suspek ang kangitngit ug mibawos pinaagi sa pagdunggab kang Rodriguez diha sa tuong dughan, tiyan ug bukton. Ang biktima gidala sa Mactan Doctors Hospital ug kasamtangang giobserbahan sa mga doktor samtang si Gugtai daling mipahilayo sa maong dapit human sa maong krimen.