Nakaangkon og bali sa ilang mga bukog ang duha ka estudyante sa grade six sa Talisay City Central School sa Poblacion Talisay human kini matumbahi sa punoan sa kahoy niadtong Huwebes sa hapon.
Ang mga biktima mao si John Edward Macairan, 12, taga Sitio Litmon, Dumlog ug Eliane Josol, 11, taga Pooc daling gipangdala sa mga maestra sa nahisgutang eskwelahan diha sa Talisay District Hospital apan tungod sa kahimtang sa duha gibalhin kini sa South General Hospital sa Naga.
Si Robesita Basalo, inahan ni Arman nga estudyante sa grade five sa mao usab nga tunghaan mibutyag nga si Arman misulti kaniya nga duha ka schoolmate niini ang natumbahan sa punoan sa kahoy sa dihang ang mga biktima nagsag-ob og tubig sa puso.
Ang nahisgutang punoan sa kahoy natumba tungod sa kusog nga hangin nahimutang tungod sa puso nga gisag-uban ni Josol ug Macairan.
Si Macairan ug Josol adunay laing tulo ka kauban nga mga estudyante usab sa maong tunghaan apan daling nakadagan sa dihang mibahirig ang punoan sa kahoy.
Ang Talisay City Social Welfare mipahigayon na og pakisusi kagahapon sa buntag sa mga biktima aron mahatagan kini og pinansiyal nga hinabang.