Buli Nahagsa; 1 Patay

Tungod sa pagbundak sa kusog nga ulan inubanan sa makusog nga hangin mugna sa bagyong Bebeng, nakalas  gyud ang kinabuhi sa asawa ug naangol usab  ang bana human matumbahi sa dakong punoan sa buli ang ilang balay samtang silang duha nanghigda diha sa ilang kusina  sa miaging adlaw sa Matutinao, Badian, Sugbu.

Ang lawas sa asawa maayong pagkapiit human madat-ogi sa lawas sa buli gani ang mga polis kinsa daling miresponde sa nahisgutan nga dapit migamit na lang og chainsaw sa gipahiyong retrieval operation aron makuha ang patay’ng lawas.

Ang namatay dihadiha giila  nga si  Vicenta dela Peña, 45, human makaangkon og dakong kadaot sa kalawasan lakip na sa  ulo niini samtang anaa pa sa tambalanan ang bana nga si Reynaldo.

Sa imbestigasyon nila ni SPO3 Orlando Caballero, PO2 Jeremias Elrado ug PO2 Emmanuel Caballero nasayran nga pasado alas 4 sa hapon ang magtiayon misulod sa kusina sa ilang panimalay kay niadtong tungora mibundak ang kusog nga uwan ug hangin.

Apan wala makabantay ang duha ka biktima nga kalit lang napukan ang dakong punoan sa buli ug diha mihagsa sa ilang kusina.

Ang tulo ka polis human sa retrieval operation maoy midala sa bana ngadto sa Badian District Hospital human makaangkon og daghang samad ug bun-og sa nagkadaiyang bahin sa kalawasan apan wala magdugay gi-refer sa mananambal sa Badian sa tambalanan sa dakbayan sa Sugbu.

Matud pang PO1 Vinchie Ramonito Acaso nga gibana-banang mokabat og 40 ka tiil ang gitas-on sa maong buli nga mihagsa sa panimalay sa magtiayon.